Япон улсын Хүүхдийн ивээх сангаас хүмүүнлэгийн туслалцаа үзүүлэх хөтөлбөрийн хүрээнд өвөлжилт онцгой хүндэрч цас ихээр орсон Увс аймгийн Сагил, Малчин, Хяргас сумын нийт 210 өрхөд бэлнээр 500,000 төгрөг, 168кг буюу 4 уут хорголжин тэжээлийг буцалтгүй тусламж болгон өгч байгаа юм. Хяргас суманд өнөөдөр энэхүү тусламжийг Япон улсын хүүхдийг ивээх сангийн төслийн ажилтан Х.Хантулга, Б.Тэмүүжин, аймгийн БСГ-ын дарга А.Болормаа, ОБГ-ийн хэлтсийн дарга М.Баянмөнх, сангийн аймаг дахь зохицуулагч Ч.Гомбосүрэн нарын бүрэлдэхүүнтэй төлөөлөгчид хөтөлбөрт хамрагдсан 70 өрхөд буцалтгүй тусламжаа гардуулан өглөө.
