Сумын ИТХ-ын дарга С.Булганхүү, ИТХ-ын төлөөлөгч, зөвлөлийн гишүүн Д.Батхишиг, Ж.Түмэнбаяр, М.Чимгээ нар Улсын төсвийн хөрөнгө оруулалтаар баригдаж байгаа 320 хүүхдийн сургуулийн өргөтгөлийн барилгын ажлын явц гүйцэтгэлтэй танилцлаа.
Тус барилгын ажлыг Д.Анхбаяр захиралтай “Мана оюу” ХХК нь хийж гүйцэтгэж байгаа бөгөөд тус компанийн ерөнхий инженер Д.Хасагаа ажлын явц, гүйцэтгэлийн талаар мэдээлэл өглөө.
Энэхүү сургуулийн өргөтгөлийн барилга нь 7.3 тэрбум төгрөгийн төсөвт өртөгтэй 2 жилийн хугацаанд баригдаж байгаа бөгөөд гэрээнд заасны дагуу 2024 оны 12 дугаар сарын 20-нд хүлээлгэж өгөх ёстой, одоогоор 35 ажилчин ажиллаж, барилгын ажлын гүйцэтгэл 85%, хэрэгцээт барилгын материал, тоног төхөөрөмжөө эцсийн байдлаар бүрэн татан авсан, гэрээт хугацаандаа барилгын ажлыг 100% гүйцэтгэлтэй хийж хүлээлгэж өгнө гэж танилцууллаа.
Уг барилга сүүлийн үеийн шинэ загварын зургаар 13 бүлэг хичээллэх анги танхим, багш ажилчдын өрөө, номын сан, интернэт өрөө, гал тогоо бүхий хоолны заал, биеийн тамир спортын заал, урлаг танхимтай бөгөөд сургуулийн гадна орчны ногоон байгууламж бүхий тохижилт, биеийн тамирын талбай, камер, гэрэлтүүлэг зэрэг иж бүрэн орчин үеийн шинэ сайхан сургуулийн барилга удахгүй ашиглалтад орж сум орон нутагт өнгө нэмэх нь ээ.
